السبت، 3 أبريل، 2010

ورقة و قلم الجزء الثاني

السلام عليكم و رحمة الله و بركاته

فاكرين المرة اللي فاتت لما قولنا عاوزين ورقة و قلم او حتى ملف نوت باد و سألنا كام سؤال ؟؟؟؟

ياترى جاوبتوا عليهم ؟
متنسوش ان احنا اتفقنا نحاول نجاوب على الأسئلة دي كل يوم و نشوف مدى قربنا لربنا

و عاوزين دلوقتي ورقة و قلم كمان و سؤال واحد بس معانا النهاردة
بس سؤال محتاج تركيز


بس ياريت محدش يتكبر على الكلام و اقرأوه للآخر و يمكن دي تكون بداية تغيير

هو احنا عارفين ان احنا هنموت ؟

بالفعل كلنا عارفين

و عارفين اننا ممكن نموت في أي لحظة

طيب ايه السبب اللي بيخلينا نعصي ربنا و احنا ممكن نموت في لحظة العصيان دي ؟؟؟

و ليه دايما نصر على اننا نعصي ربنا ؟

و مضيعين حقوق ربنا ليه ؟

انا بجد عاوز اجابة مقنعة

انا الاجابة اللي متصورها ان السبب ان مفيش تصور
مفيش تصور " تخيل " للجنة و لا للنار

اللي بيعصي ربنا دة يا اما ميعرفش ان نار جهنم اكبر من اكبر نار في الدنيا بسبعين مرة
يا اما مش متصور و مش عاوز يصدق
اللي بيعصي ربنا دة يا اما ميعرفش ان غمسة واحدة في النار هتخلي انعم أهل الدنيا ينسى كل النعيم اللي شافه
و ان غمسة واحدة في الجنة هتخلي اشقى اهل الدنيا ينسى كل الشقاء اللي شافه
يا اما ميعرفش كدة يا اما الشيطان بيضحك عليه و بيصور له الامور هينة

هيقول ربنا غفور رحيم

فعلا ربنا غفور رحيم بس ليه متقراش الاية كلها ؟

قال تعالى : " غَافِرِ الذَّنْبِ وَقَابِلِ التَّوْبِ شَدِيدِ الْعِقَابِ ذِي الطَّوْلِ لَا إِلَهَ إِلَّا هُوَ إِلَيْهِ الْمَصِيرُ "

شديد العقاب ذي الطول
و انت مؤمن ان ربك سميع بصير و لا لا ؟

قال تعالى : " لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ "

طيب يعني ايه انك مؤمن بكدة ؟

يعني انت مؤمن بإن ربنا شايف كل حاجة انت بتعملها
و سامع كل حاجة انت بتقولها

مطلع على كل اعمالك و اقوالك

صح كدة ؟

طيب لو قلتلك ان والدك قالك متمشيش مع صاحبك فلان دة تاني
و انت بتحب والدك جدا و هيعاقبك كمان لو مشيت مع صاحبك دة
و انت عارف انه مش عاوز غير مصلحتك

لو انت عارف كل دة عن والدك

هل هتفكر تمشي مع صاحبك دة ؟ على الاقل و والدك شايفك ؟

طيب لو انت بتحب ربنا و عارف كويس ان ربنا لا يريد لك إلا الخير
كل أمر و نهي لربنا فيه حكمة و فيه مصلحتك
و لو خالفت أمره و نهيه اولا هيكون فيه ضرر ليك أكيد
ثانيا ممكن يعاقبك
ثالثا ممكن يغضب عليك
ازاي تعصي ربنا و انت عارف انه شايف كل حركاتك و سكناتك

انت متصور يعني ايه يغضب عليك ؟؟؟؟
انت تستحمل نظرة غضب من ربك ؟؟؟؟ !!!!!


بعد كل دة ليه مصّر تعصي ربنا ؟؟
ليه مصّر انك متصليش الصلوات الخمس ؟
ليه مش عاوز تغض بصرك عن الحرام ؟
ليه مش عاوز تبطل تسمع أغاني و انت عارف انها حرام ؟
ليه مش عاوز تبطل تدخين ؟

انت عارف نعم ربنا عليك ؟ كام نعمة ؟
اكيد طبعا متقدرش تعدها
طيب مش خايف و انت مبتغضش بصرك عن الحرام ان ربنا يسلبك نعمة البصر ؟
مش خايف و انت بتسمع الاغاني و هي حرام طالما فيها موسيقى ان ربنا يسلبك نعمة السمع ؟
ممش خايفة الي بتلبس حاجات تغضب ربنا ان ربنا يبتليها بشلل نصفي او رباعي ؟؟؟؟
مش خايفة يجيلها شلل بسيط في اعصاب الوجه تخليه تغطي وشها غصب عنها ؟
مش خايف يجيلك شلل و رجليك تبطل تتحرك علشان متمشيش للحرام ؟

انت لم بتشوف واحد اعمى او عنده شلل بتستعيذ بربنا انك تبقى مثل حالته
طيب ليه متشكرش نعم ربنا عليك ؟

و غير كدة
مش انت بتحب ربنا ؟

ليه سايب غيرك يعصيه ؟ اقل حاجة تعملها انك تأمره بالمعروف و تنهاه عن المنكر

قال رسول الله صلى الله عليه و سلم : "من رأى منكرا فليغيره بيده فإن لم يستطع فبلسانه فإن لم يستطع فبقلبه و ذلك أضعف الإيمان " رواه مسلم

و قال رسول الله صلى الله عليه و سلم : " والذي نفسي بيده لتأمرن بالمعروف ولتنهون عن المنكر أو ليوشكن الله يبعث عليكم عذابا منه ثم تدعونه فلا يستجيب لكم "

يا ترى احنا بنعمل اللي علينا

الكلام دة موجه لي شخصيا قبل أي حد تاني

احنا ليه لسة بنعصي ربنا
ايه السبب ؟

ايه السبب بعد دة كله انك تعصي ربنا ؟

ايه اللي يستاهل انك تخلي ربنا يغضب عليك أو يسلبك نعمة من نعمه ؟

ايه اللي يستاهل ؟

متنسوش اجابة السؤال الاصلي

ايه السبب ؟

الحق نفسك و توب لربنا بسرعة

اتمنى مكونش طولت عليكم المرة دي

جزاكم الله خيرا

سلام عليكم




هناك 5 تعليقات:

  1. اللهم انزع الوهن من قلوبنا و اجعل الدنيا في أيدينا ولا تجعلها في قلوبنا ولا تجعلنا نحب الدنيا ونكره الموت فهو ملاقينا ......آمين ...جزاك الله خيرا



    أسرة منتدى زبد البحر يتمنى منكم التواجد معنا في منتدى عالم المدونيين والمدونات

    http://mhg1962.ba7r.org/forum.htm

    ردحذف
  2. السلام عليكم ورحمة الله وبركاته جزاكم الله كل خير وفيك الخير والله ونفع الله بك وبمدونتك الجميلة

    ردحذف
  3. السلام عليكم أرجو منك الاستمرار والمداومة فى وضع الموضوعات وسيكون لك شأن إن شاء الله فى العهد القريب

    ردحذف
  4. السلام عليكم
    أسأل الله أن ييسر لك كل عسير

    ردحذف
  5. عيد سعيد أخي

    ترى أين أنت كي نكمل سويا ما بدأته؟

    ردحذف

شاركني الأجر و أبدي رأيك